მამაკაცების მომზადება ინ ვიტრო განაყოფიერებისთვის

წყვილში უნაყოფობის მკურნალობის პროცესში ჩართულია როგორც ქალი, ასევე მამაკაცი. ინ ვიტრო განაყოფიერების პროცედურის წარმატება დიდწილად დამოკიდებულია პარტნიორის მომზადებაზე.

SILK Medical-ში დიდ მნიშვნელობას ვანიჭებთ პროგრამისთვის მომზადების არა მხოლოდ სამედიცინო, არამედ ფსიქოლოგიურ ასპექტებს. ასევე, ჩვენი ექსპერტებისგან მიიღებთ რეკომენდაციებს დიეტასთან, ვიტამინებთან და ზოგადად ცხოვრების წესთან დაკავშირებით.

ზოგადი რეკომენდაციები

პროგრამისთვის მომზადებისას მნიშვნელოვანია გავითვალისწინოთ შემდეგი ფაქტი: სპერმატოზოიდების სრული „განახლების“ პროცესი თვენახევრიდან ორნახევარ თვემდე გრძელდება. ამიტომ, იდეალურ შემთხვევაში, მამაკაცმა უნდა დაიწყოს მომზადება პროცედურის მოსალოდნელ თარიღამდე ორი-სამი თვით ადრე. ამ შემთხვევაში მიიღება საუკეთესო ხარისხის სპერმატოზოიდი ინ ვიტრო განაყოფიერებისთვის.

რა არის მნიშვნელოვანი სპერმის ხარისხის გასაუმჯობესებლად?

მავნე ჩვევებზე უარის თქმა– მოწევა და ალკოჰოლის დალევა. ნიკოტინი და ეთანოლი უარყოფითად მოქმედებს სპერმატოზოიდების მომწიფებაზე, ამცირებს მათ რაოდენობას, ამცირებს მათ მობილურობას, ზრდის მორფოლოგიურად არასწორი ფორმების რაოდენობას.

წონის მართვა და ჯანსაღი კვება. ჭარბი წონა მჭიდროდ არის დაკავშირებული მამაკაცის ორგანიზმში ჰორმონალურ დისბალანსთან, რაც უარყოფითად მოქმედებს სპერმატოგენეზზე. ინ ვიტრო განაყოფიერებისთვის მომზადებისას კვების რაციონიდან უნდა გამოირიცხოს ე.წ. „დასავლური“ დიეტა: სწრაფი კვება, ტკბილი გაზიანი სასმელები, ზედმეტად ცხიმიანი და ტკბილი საკვები. ორგანიზმისთვის სასარგებლო იქნება უცხიმო ხორცი, ზღვის წყლების თევზი, ახალი ბოსტნეული და ხილი, თხილი. ექიმმა ასევე შეიძლება რეკომენდაცია გაუწიონ მედიკამენტების კურსს, რომლებიც აუმჯობესებენ სპერმატოგენეზს.

ზომიერი ფიზიკური აქტივობა. უმოძრაო ცხოვრების წესი თანამედროვეობის ნამდვილი უბედურებაა. ფიზიკური აქტივობის ნაკლებობა გავლენას ახდენს როგორც ზოგად ჯანმრთელობაზე, ასევე რეპროდუქციული სისტემის ჯანმრთელობაზე. ექსპერტები აღნიშნავენ მცირე დროით, თუმცა რეგულარული ფიზიკური დატვირთვის მნიშვნელობას: მაგალითად, სუფთა ჰაერზე ყოველდღიური ნახევარსაათიანი სეირნობა უფრო სასარგებლოა ორგანიზმისთვის, ვიდრე ორ კვირაში ერთხელ სპორტდარბაზში სამსაათიანი ინტენსიური ვარჯიში.

მოერიდეთ ორგანიზმის გადახურებას. ნორმალური სპერმატოგენეზი მოითხოვს შესაბამის ტემპერატურას. გამომდინარე აქედან, სათესლე ჯირკვლები, სადაც სპერმატოზოიდები მწიფდება, გამოტანილია სხეულის ღრუს გარეთ. ტემპერატურის მატება იწვევს სპერმატოზოიდების მომწიფების დარღვევას. შესაბამისად, რეკომენდირებულია შეამციროთ ცხელ აბაზანაში, აბანოში, საუნაში და ა.შ. გატარებული დრო. უმჯობესია არ გამოიყენოთ მანქანაში სავარძლების გათბობა.

ტესტები და გამოკვლევები ინ ვიტრო განაყოფიერებამდე მამაკაცისთვის

ყოვლისმომცველი სპერმოგრამა (მოიცავს სტანდარტულ სპერმოგრამას და კრუგერის მორფოლოგიას) – მამაკაცის მთავარი ანალიზი. აღნიშნული საშუალებას გაძლევთ სწრაფად და ზუსტად შეაფასოთ სპერმის ხარისხი, გამოავლინოთ პათოლოგიები და მიიღოთ შესაბამისი ზომები მათ აღმოსაფხვრელად.

ინ ვიტრო განაყოფიერებამდე სტანდარტული გამოკვლევის პროგრამის ფარგლებში სავალდებულოა ინფექციური და ვირუსული დაავადებების ტესტების ჩატარება (სისხლის ანალიზი და ურეთრის ნაცხის კვლევა).

გენეტიკური კვლევები – კარიოტიპირება, სპერმატოზოიდების დნმ ფრაგმენტაციის განსაზღვრა. სავალდებულო კვლევების ჩატარება აუცილებელია 40 წელზე უფროსი ასაკის მამაკაცებისთვის, მემკვიდრეობითი დაავადებების მქონე მამაკაცებისა და უცნობი წარმოშობის უნაყოფობის გაზრდილი რისკის მქონე მამაკაცებში.

კვლევის შედეგებიდან გამომდინარე, ექიმი დაგინიშნავთ მკურნალობის კურსს (საჭიროების შემთხვევაში) და შეარჩევს ყველაზე ეფექტურ ინ ვიტრო განაყოფიერების პროგრამას – კლასიკურ ან ინტრაციტოპლაზმურ სპერმის ინექციას (ICSI). მამაკაცში უნაყოფობის მძიმე შემთხვევებში სპერმატოზოიდები მიიღება ქირურგიულად TESE მეთოდის საშუალებით.

გელოდებით SILK Medical-ში. ჩვენს სპეციალისტებს აქვთ ინ ვიტრო განაყოფიერების პროგრამების მომზადებისა და მათი წარმართვის დიდი გამოცდილება თქვენი კონკრეტული ქეისის ყველა ინდივიდუალური მახასიათებლის გათვალისწინებით. ჩვენი გუნდის პრინციპს წარმოადგენს უზრუნველყოს მკურნალობის მაქსიმალური ეფექტურობა ჩვენი პაციენტებისთვის მაქსიმალური კომფორტის შენარჩუნებით.